Листата на намирници што можете да ги јадете во бременоста е навистина долга. Но, ова не значи дека треба да јадете за двајца, туку да се храните двојно поквалитетно.

Во продолжение дознајте кои се шесте видови храна што треба да ги консумирате за одржување здрава и витална бременост.

Храна 1: Риба

За здрава бременост се препорачува неделно консумирање од 1-2 порции риба богата со масни киселини омега 3, кои се важни за правилен развој на бебешкиот мозок и на бебешките очи.

Безбеден избор се следниве видови риба:

• лосос,
• ослиќ,
• пастрмка,
• шкампи,
• инчуни.

Внимавајте на рибите уловени во загадените мориња бидејќи можат да акумулираат големи количини жива, која е многу токсичен елемент.

Додека сте бремена и додека доите, најдобро е да избегнувате риба со високо ниво на жива, како на пример:

• скуша,
• ајкула,
• сабјарка,
• атлантски крап,
• туна (особено биге-туна),
• марлин.

Доколку не сте љубител на рибите, добра алтернатива се суплементите омега 3.

Храна 2: Фолати

Фолатите се клучни за спречување вродени дефекти кај плодот пред бременоста и за време на нејзиното траење, во првото тримесечје.

Храната богата со фолати која треба да се консумира во текот на целата бременост вклучува:

• цвекло,
• блитва,
• аспарагус,
• кафеав грав,
• дуња,
• портокали,
• авокадо.

Најчесто е потребно да се додаде и фолна киселина како додаток во исхраната (барем 400 микрограми дневно), за да се спречи невролошки дефицит кај бебињата, особено во првиот триместар од бременоста.

Храна 3: Јогурт

Дали сте знаеле дека обичниот јогурт содржи повеќе калциум отколку млекото? Освен што е богат со протеини, витамин Б, цинк и со хранливи материи, јогуртот му помага на бебето за развивање здрави коски и заби.

Ако вашето тело има недостиг од калциум за време на бременоста, докторот ќе ви препорача додатоци во исхраната што содржат калциум, за да се сведат на минимум последиците од недостигот на калциум за бебето и за мајката.

Храна 4: Овесна каша

Овесната каша е еден од најдобрите оброци во бременоста бидејќи е полна со растителни влакна, протеини и со витамин Б₆.

Овесната каша е одличен начин и за справување со една од најчестите појави во бременоста – констипацијата, но и за враќање на енергијата по утринските мачнини.

Може да ја вклучите и во различни комбинации, како на пример десерти, палачинки, мафини или смутија.

Храна 5: Немасно месо

Во бременоста на вашето тело му требаат многу повеќе протеини (околу 25 дополнителни грама на ден) за да обезбедите правилен раст и развој за мускулите на плодот.

Еден од најдобрите извори на протеини се говедското и свинското месо, кои се богати и со железо и со витамини од групата Б (Б₆ и Б₁₂).

Недоволното внесување железо може да ги наруши растот и развојот на бебето, да доведе до предвремено породување и до мала тежина на бебето, а кај мајките да предизвика анемија.

Витаминот Б₁₂ помага за одржување здрави нерви и црвени крвни клетки, а витаминот Б₆ помага за развој на мозокот и на ткивата на бебето, но помага и при ублажување на утринските мачнини.

Превентивно, или доколку крвните анализи покажат недостиг на овие витамини и минерали, вашиот доктор ќе ви ги препорача во вид на додатоци во исхраната.

Внимавајте месото што го консумирате секогаш да биде добро сварено или печено. Недоволно сварено или сурово месо го зголемува ризикот од инфекции како што се токсоплазмата, ешерихија коли, листеријата и салмонелата.

Дополнително, избегнувајте виршли и сувомесни производи. Овие видови месо лесно може да се заразат со разни бактерии за време на обработката или складирањето.

Храна 6: Јајца

Јајцата се златен стандард во исхраната на секоја бремена жена бидејќи се полни со протеини, фолна киселина, железо и со витамини од групата Б.

Сите овие витамини и минерали се особено важни за бремените жени заради развој на мозокот и на ’рбетниот мозок на бебето, како и на натамошната способност за учење, и заради подобра меморија.

Јајцата може да ги комбинирате со секаков оброк и во која било форма: на око, како омлет, печени или варени.

Бидете особено внимателни кога консумирате:

• сосови со јајца,
• домашен мајонез,
• домашни преливи за салата,
• домашен сладолед,
• домашна глазура за торта.

Повеќето производи што можат да се купат во продавница, а што содржат јајца, се направени со пастеризирани јајца и се безбедни за консумирање. Сепак, секогаш треба да ја прочитате етикетата за да бидете сигурни.

Бонус совет: внимавајте на митот „да се јаде за двајца“

Внимавајте на митот „јадеш за двајца“. Треба да јадете двојно поквалитетно, а не количински како за двајца.

Како што напредува бременоста само треба постепено да го зголемувате бројот на калории што ќе ги внесете преку исхраната.

Водете се според следниве правила:

• во првиот триместар продолжете со нормалната исхрана;
• во вториот триместар зголемете за околу 350 калории дневно;
• во третиот триместар зголемете за околу 450 калории дневно.

Не заборавајте дека оптималниот план за исхрана во бременост се состои од оброци и од закуски богати со протеини, зеленчук и овошје, здрави масти и со јаглехидрати богати со влакна, како на пример цели зрна грав и зеленчук со скроб.

За да дознаете повеќе за придобивките од „ПреМама Дуо“: https://zdravjebezrecept.mk/brand/premama-mk/