Често ве болат мускулите по физичка активност? Не можете да се ослободите од болката во грбот? Како да им помогнете на вашите мускули да закрепнат побргу?

Ова се 6 докажани начини како бргу да ја елиминирате болката во грбот и во мускулите, кои можете да почнете да ги практикувате уште денеска.

Начин 1: Храна која ги намалува воспалените процеси

Правилната исхрана е еден од најдобрите начини за брзо закрепнување на мускулите.

Еве кои намирници се одличен сојузник против воспалението и против болките во мускулите:

• Протеини: јајца, млеко, риба, говедско месо, пилешко месо и мисирка

• Храна богата со витамините А, Ц и Е: авокадо, цвекло, брокула, бобинки, моркови, цитрусни овошја (лимон, грејпфрут, мандарина, портокал), зелена салата, сладок компир, бадеми и тиква

• Храна богата со масни киселини омега 3: лосос, туна, харинга, ореви, мелено ленено семе и чија-семе

• Храна богата со витамин Д: риба, жолчки од јајце и збогатени млечни производи

• Зачини кои ги намалуваат воспалителните процеси: куркума, каранфилче, морско оревче, ѓумбир и цимет

Пред физичката активност консумирајте протеини за да му помогнете на телото подобро да се справи со оштетувањето на мускулите. Правилото е консумирање 1,4 до 1,8 грама протеини на килограм телесна тежина.

По вежбањето јаглехидратите се одличен начин како да го вратите нивото на гликоген што го користат мускулите како примарна форма на енергија.

Се препорачува консумирање 1,2 грама јаглехидрати на килограм телесна тежина, како на пример бел ориз, компир, житарки, интегрални тестенини итн.

Начин 2: Хидрација

Дехидрацијата може да ја наруши способноста на вашите мускули да закрепнат, особено при активности на топло време.

За подобра хидрација на организмот водете се според следниве правила:

• 2-3 часа пред физичка активност – 2 чаши вода;
• 20-30 минути пред физичка активност – 1 чаша вода;
• за време на физичка активност – половина чаша вода на секои 15 минути;
• по завршување на активноста – една чаша вода не повеќе од 30 минути по вежбањето.

Покрај водата овие пијалаци се, исто така, одлични за хидрација:

• зелен чај – полн со антиоксиданси и помага да се создаваат молекули богати со енергија за нашите тела;

• сок од цреша – ги намалува воспалението, оштетувањето на мускулите и болката.

Начин 3: Суплементи

Суплементите се понекогаш неопходен начин за да им се даде на мускулите горивото што им е потребно.

• Креатин монохидрат – помага да се подобри мускулната сила кога се комбинира со активност што вклучува кревање тежина и да се надополнат резервите на гликоген во вашите мускули.

• Протеински прашоци (сурутка и колаген) – содржат целосен спектар на есенцијални аминокиселини како начин за да додадете повеќе протеини во вашата исхрана.

Начин 4: Масажа

Масажата е еден од најефектните начини за брзо намалување на болката во мускулите.

• Масажа со гел што содржи ибупрофен

Масажата комбинирана со гел што содржи ибупрофен со левоментол за само неколку минути ќе ви ја ублажи болката и ќе ги намали воспалението и отекувањето.

Дополнително, геловите на база на ибупрофен можат да помогнат при:

• болки во грбот,
• болки и отекувања предизвикани од исчашувања, истегнувања и од спортски повреди,
• ревматски и мускулни болки,
• невралгија,
• болки при благи до умерени артритични состојби,
• масажа со есенцијални масла.

Есенцијалните масла се одлични не само за релаксирање на телото, туку и за ублажување на болките во мускулите.

Изберете масло од лаванда, мента или од рузмарин за масажа на болните делови од телото.

Не заборавајте дека етеричните масла се високо концентрирани и дека можат да ја иритираат вашата кожа. Затоа разредете ги пред да ги нанесете директно на кожата.

Начин 5: Спиење

Спиењето е бесплатен начин за заздравување на целото тело. Луѓето што се под постојана физичка активност имаат потреба од подолг сон (9-10 часа).

Истражувањата покажуваат дека недостигот од сон може да ги наруши заздравувањето на мускулите и производството на хормони што помагаат за раст на мускулите.

Начин 6: Туширање со наизменично пуштање топло-ладна вода

Туширањето со наизменично пуштање топло-ладна вода изгледа како вистински предизвик, но има многу придобивки за телото. Пробајте на секоја минута од туширањето да ја менувате водата од топла во ладна и обратно.

Оваа нагла промена на температурата на водата ги стимулира проширувањето на вашите крвни садови и протокот на крв низ телото.

Истражувањата покажуваат дека овој начин на туширање ја намалува болката во мускулите по напорната физичка активност.

Што треба да избегнувате?

На листата на производи што треба да ги избегнувате за телото побргу да се ослободи од болка се следниве:

Алкохол

Консумирањето алкохол ја нарушува способноста на вашите мускули да го надополнуваат гликогенот по физичката активност. Дополнително, алкохолот ја нарушува и синтезата на протеините во вашите мускули.

Тутун

Пушењето цигари негативно влијае врз вашиот мускулно-скелетен систем зголемувајќи го ризикот од мускулна повреда.

Дополнително, пушењето е поврзано со зголемен ризик од развој на болести на зглобовите и со зголемен ризик од фрактура на коските.